Mga Tao Bawal na sa Maynila

Ipinatupad ngayong araw ang bagong ordinansa ng Lungsod ng Maynila na nagbabawal sa mga tao na pumasok sa lungsod. Ayon kay Vice Mayor Isko Moreno, ginawa nila ang ordinansa na ito upang maalis na ang siksikan ng mga tao sa Kamaynilaan.

Vice Mayor Moreno at Mayor Erap, ibinida ang bagong Human Ban Ordinance.

“Mapapaluwang na natin ang Tondo, ang Quiapo, Divisoria at ang buong Taft Avenue na laging siksik sa dami ng mga tao”, dagdag ni Moreno.

Siniguro ni Mayor Erap Estrada na papasukin pa rin ang ilang mga tao sa Maynila. Magbibigay sila ng certification para sa mga taong pwedeng pumasok sa lungsod. Ang bawat isang certificate ay nagkakahalaga nang 1 milyong piso at itatak sa noo upang masigurong hindi mapepeke.

Lim Unang Nakatikim ng Ordinansa

Ipinatupad agad kaninang alas-dose nang madaling araw ang nasabing ordinansa. Unang nasampolan ay ang dating Manila Mayor Fred Lim at kanyang mga taga-suporta.

Kinumpirma ni Manila Police Chief Marcelo Garbo na kanilang pinaalis si Lim alisunod sa ordinansa.

“Pinalangoy na namin si Dirty Harry sa Manila Bay. Isa kasi siyang tao at bawal na ang tao dito sa Maynila,” pahayag ni Garbo.

---

Image source: GMA News Online

Mga Priority Projects ni Erap Inilatag

(Source: Solar News)

“Bago na ang Maynila” - ito ang ipinangako ng bagong alkalde ng Maynila na si Joseph Ejercito-Estrada sa kanyang proclamation rally isang araw matapos ang eleksyon.

Naglitanya sa buong programa si Erap tungkol sa masamang kahulugan ng kulay na dilaw. Ayon sa dating-presidente na isa ring ex-convict, ang dilaw daw ay kulay Hepatitis at kailangang burahin sa buong lungsod.

Upang malutas ang problemang ito ay inihayag ni Erap ang kanyang priority projects para sa Maynila. Ito ay ang palitan ang kulay dilaw ng machong kulay na orange.

Unang tatamaan ng proyektong ito ang mga yellow boys traffic enforcers na tatawagin nang orange boys. Gagawin na ding orange ang kulay ng lahat ng poste, sidewalks at pader sa buong lungsod.

Ipinagako rin ni Erap na papalitan niya ng mukha niya ang lahat ng poster ni ex-mayor Alfredo Lim na nakakalat sa buong Maynila.

Sawa na sa Dilaw

Tuwang-tuwa naman si Aling Nena, isang may-ari ng karinderya sa tapat ng La Salle. “Sawang-sawa na ako sa dilaw. Gusto ko naman ng bagong kulay. Maganda ang orange,” aniya. Wala namang masagot ang tindera kung ano ang magagawa ni Erap sa anak niyang nakatira sa ilalim ng tulay.

Ayon sa mga political analyst ay natalo sa Alfredo Lim dahil sa nagsawa na ang mga Manilenyo sa kulay dilaw. Sa tingin ng mga tao ay walang originality si Lim dahil parang kinopya n'ya lang ang dilawang kulay ng mga Belmonte sa Quezon.